Kidsmust親子推介指數：
有枱有嘢食嘅巴士：水晶巴士Crystal Bus香港遊
未出發先興奮呀，弟弟一聽到有得去試坐水晶巴士，就即刻話要返去同幼稚園老師講佢會搭一架有枱嘅巴士！
坐巴士坐得多，不過有枱、有豪華座位、有熱辣辣新鮮點心供應的巴士就真係第一次搭咋！講緊係水晶巴士Crystal Bus。水晶巴士Crystal Bus係香港第一輛「觀光X美食」雙層巴士，讓遊客一邊舒舒服服欣賞香港景色，一邊飽嘗米芝蓮點心，真係歎到呢！對於巴士迷的弟弟就最吸引了，以前我地試過好多次即日搭機場巴士往來機場，為的就是要欣賞沿途風光。
叫得水晶巴士當然係有水晶啦！仲要係有十幾萬粒呀，全部都係由水晶師傅人手鑲嵌，真係好靚呀。
不過上得水晶巴當然唔單止欣賞車箱設計咁簡單，事關香港景色真係好靚，兩個半小時的行程可以見到䌓華的市區和廣闊的大自然景緻，真係一絕！水晶巴士分下午團和晚餐團，差不多每日都會開辦，晚餐團以港九兩岸䌓華景色為主，而今次我地就玩咗個下午團，由尖沙咀出發，經青馬大橋到欣澳折返。要睇風景梗係要坐上層啦，平時兩拖三搭巴士好難一齊上上層坐，今次水晶巴士停定定俾我地上，仲有超闊落座位。人但其實下層都有好玩玩意，又有大電視，啱晒開party。
沿途巴士會以廣東話播放導航，介紹香港著名景點。話時話在香港生活咗咁耐，有些景點真係唔認識，又可以長知識了！
在巴士團上可以享用「一點心」米芝蓮點心餐，為咗保證新鮮熱辣，巴士仲專登在太子停一停將店舖剛煮好的點心直送上車，可見佢地服務一絲不苟！「一點心」係曾榮獲米芝蓮星級嘅食肆，而在Tripadvisor 香港區6000多家食店中，排名口碑高達第20名，一定要試試！我地每人可以享用：
- 飲品一支（上車時奉上）
- 蝦餃、燒賣蘿、蔔糕、春卷、叉燒餐包及珍珠雞
- 甜品：馳名香芒奶皇卷（在青嶼幹線觀景台稍作停留後享用）
人有三急點算？上車前服務員已好細心提醒要去一去廁所先（廁所可以借用尖沙咀青年會酒店，那裡還有書店和藝術活動空間，啱晒小朋友玩），而中途巴士會在青嶼幹線觀景台停留約30分鐘，可以去廁所或欣賞青馬大橋風光，果度仲有一間專賣模型火車的特色店舖，平時自己搭車好難去的，小朋友去放一放電就啱晒！
Kidsmust小小測試員點評
睇到佢地笑得咁開心，當然俾水晶巴士高分啦！
Kidsmust爸爸點評
讚！
- 輕輕鬆鬆遊九龍新界，最啱帶小朋友參加，尤其是有巴士迷小朋友的家庭，是一個新奇有趣的親子活動！
- 巴士座位寬闊又舒服，坐兩個多小時都唔會累，沿途風景真美，一日可以欣賞到咁多地方，正！當日室外得8、9度，坐在巴士中遊覽真係倍覺舒適架！
- 服務員細心有禮，講解清楚，讚！
- 巴士好靚，點心夠靚，風景更加靚！
可以改進
- 中途停留點可以更耐就更好，因為去完廁所再跑上去青馬觀景台訪客中心及著名的火車專賣店已經要折返，唔夠時間去到觀景台……巴士遊都算係比較靜態的活動，中間有多點放電時間就最啱小朋友！
特別企劃：慶祝生日好點子！
在M記／會所搞生日會搞到厭的爸媽可以考慮一下帶仔女來水晶巴士慶生，甚至搞個Crystal Bus生日慶祝團，保證巴士迷仔女錫晒你。在我地試坐當日，同車就有父母陪到就快5歲生日的囝囝，帶埋朱古力蛋糕來慶生，工作人員會在我地食甜品的一刻播放生日歌及在電視螢幕顯示精心設計的生日e-card添。而我地有幸同佢地一齊慶祝，唱生日歌和食蛋糕！
水晶巴士生日免費驚喜：生日壽星可於生日正日前後兩星期內星期一至五免費搭水晶巴士，仲免切餅費，壽星仲有一份神秘生日禮物添！
而同一時間又有另一團28人包了第二架水晶巴士，帶了backdrop和禮物，親戚朋友開開心心遊香港！
利申：除了Crystal Bus贊助今次試玩外，Kidsmust並沒有收取任何報酬，這個試玩報告是我們的真實評價。
