親子郵輪Staycation：估唔到郵輪咁啱親子玩！

Kidsmust親子推介指數：

短線親子旅行多數都係去廣東／澳門玩，或在香港親子酒店住返晚，原來市面上仲有一款叫做「Weekend🚢郵輪遊」，全家唔洗請假都可以同仔女過一個悠閒的週未，啱晒忙裡偷閒嘅香港人，聽來好似幾吸引…… 不過，親子郵輪遊？相信好多爸媽都冇考慮過，事關最擔心「誤上賊船」，食又唔好食，玩又冇野玩，見到嘅只有海同海，走又走唔到，一個個可愛的小朋友被逼變成野獸，爸爸媽媽一心諗住去渡假變咗困獸鬥，最苦的假期莫過於此！

星夢郵輪 Dream Cruises（包括：World Dream世界夢號＋Genting Dream雲頂夢號）不時都有買1送1／早鳥優惠，上官網可以即時報名，仲係最抵最平，記住check住呢度即時收到最新 星夢郵輪 Dream Cruises優惠資訊！

今次係搭2017年11月下水的World Dream世界夢號，又新又靚！三日兩夜由香港出發向南兜一圈再返香港。

今次我地去World Dream世界夢號來一個三日兩夜staycation，等我地同大家測試下親子郵輪Staycation得唔得啦！即刻去片：

https://youtu.be/6Ja0yxXYKvk

🚢郵輪Package包D乜？

Weekend郵輪遊每位只需千幾二千蚊起，比去澳門平幾多，未試過郵輪遊嘅父母，一定會諗就算個價錢好似幾吸引都好，郵輪上消費一定貴，玩乜都要逐樣計，要就住就住，仲可能要簽美金有額外手續費添⋯⋯原來世界夢號係用港幣計數，消費真心唔貴，最正就係在郵輪上唔用錢都得架，我地結賬只係用了幾佰蚊咋（未計跟人頭計的服務費），就可以落船了！

第一次在啟德郵輪碼頭登船，指示好清晰，好多工作人員提供協助。仲可以欣賞到全球最大的Lego郵輪模型，正！

個郵輪遊package價錢包咗下面咁多項：

• 客房（同一般酒店房無異，有齊樽裝水／電視／風筒／茶啡／沖涼用品／BB床／Playpen等）：分內倉、海景、露台同埋以上級別，露台房個view真係超讚！
• 「免費」餐廳用膳（有buffet或中菜套餐選擇），食物款式和味道比得起香港3/4星自助餐，有提供幼童櫈
• 娛樂設施：Little Pandas Club（室內遊戲室）、泳池、滑水梯、繩網、攀石、球類運動
• 節目：舞台show、音樂表演、電影、講座、瑜伽、太極、激光show、workshop等等（一上船就會攞到一份《星夢情報》，詳列全個行程的活動／開放時間／地點等，記住留意有乜係有quota要報名即去6樓報咗先，好快full架！）

客房同普通酒店房無異，有齊電視、樽裝水、Coffee or Tea、廁所沖涼房⋯⋯最最最特別係有個超級無敵全海景露台！

註：在船上用Wifi上網要另費（全程約需二佰幾，可連兩部機），亦要俾每日服務費（每人每晚約$120），當然仲有自費飲食／項目，不過唔算貴！

有乜啱小朋友食同玩？

• Free游水！冇錯，香港得返10度咁凍都可以在船上游到水同玩滑水梯，因為隻船會向南駛去溫暖海域，可以同陽光玩遊戲，下午仲會覺得熱添！可惜今次以為好凍，冇帶到泳衣添⋯⋯
• Free室內play house「Little Pandas Club」，裡邊有好多玩具、電視、遊戲機可以俾小朋友玩，空間又大又舖滿軟墊，仲有專人睇住小朋友，由2歲到12歲都可以，一節2小時幫埋你託兒！唔駛睇住小朋友，最啱爸爸媽媽去relax下！
• Free自助早餐、自助午餐同自助晚餐，整個行程食足5餐自助餐，有飯有甜點，小朋友都啱食！
• Free房裡嘅電視可以點播電影，今次我地睇了「Beauty and the Beast」同「Finding Dory」呀
• Free仲有mini Golf、繩網、乒乓球、攀石等等等等⋯⋯

有乜啱爸爸媽媽食同享受？

• 飲食：正宗馬來美食（如喇沙、燒雞飯）、刨冰、雪糕、cake、中式小炒、海上打邊爐、High Tea、鋸扒、鐵板燒、壽司等等，當然仲有免費buffet啦，有間餐廳仲係24小時營業架！

• SPA／按摩：由著名的Crystal Life Wellness獲獎星級SPA集團提供服務，設施服務質素一流，仲要有限時特價（今次所有服務都有半價！），今次Kidsmust媽媽做了一個90分鐘的Holistic 熱石Massage，都係五佰幾蚊咋，勁抵！最正就係SPA開到淩晨1點，晚上等埋小朋友訓咗覺先去relax下都得，喺香港真係好難可以搵到！
• 剪髮：無錯，隻船上係有得剪髮，仲要一D都唔貴架
• Shopping：在公海免稅shopping各大名牌，價錢比在香港買平好多架
• Free刺激滑水梯、繩網、攀石、球類、日光浴（好多都係免費的！）
• 海上賭場（Kidsmust鼓勵珍惜多點親子時間，唔好賭博⋯⋯）

上船前要準備D乜？

• 由於要過海關出入境，大人要帶身份證，小孩則要身份證＋護照
• 兩套衣服、睡衣及外套（洗頭水／沐浴露、牙膏、牙擦等都有提供）
• 泳衣（船上有提供大毛巾）
• 小朋友的公仔、玩具／BB的奶樽、奶粉、尿片、食具等等

房間有提供嬰幼兒專用個人用品，夠細心！

Kidsmust小小測試員點評

睇佢地咁開心就知Weekend郵輪遊好玩啦，佢地一啲唔舒服／暈浪嘅感覺都冇（原來由於小朋友好易分心，所以唔易覺暈浪架）！落船時，小朋友都嚷著要多留在郵輪上幾天，妹妹更在返到屋企大哭，說唔要返屋企要上船！

開心，開心，勁開心！

Kidsmust爸爸點評

讚！

• 好難得帶住3隻野3個小朋友竟然都可以有拍拖❤時間，真係好耐冇試過，彷彿回到未生小朋友前！
• 上船前的waiting time有免費水和餅食供應，可以塞住小朋友把口
• 世界夢號有個App可以提供郵輪活動資訊，唔駛俾錢買Wifi都可以用到，最正可以用個App同第二間房的朋友好似用Whatsapp咁溝通。
• 一個地方，食玩瞓有齊，而且非常集中，玩完去食，食完去玩，仲可以瞓個晏覺都得！隻船夠晒大，比巴黎鐵塔仲要長，所以好平穩！
• 就算隻船可以載三千幾人，再加埋二千個船員／表演人員，但係就覺得一D都唔逼，仲要係去好多地方玩都唔駛點排隊，感覺撞口撞面係得幾百人，上船落船都超順暢！當然過海關同檢查就一定要排一陣隊啦，但覺得比起搭飛機方便快捷得多。
• World Dream世界夢號夠新夠豪夠靚，仲要係剛剛在2017年11月落水咋，設施同客房一定冇得輸！房裡的熱水同冷氣差不多一開即有呀，非常舒適！
• 消費真係唔貴：一碗有水準的喇沙只係$22、一杯意大利雪糕$17；仲要有優惠時間：切餅$7.5一件、中式小食只係$5！
• 幼童有專屬梳洗用品，房間拖鞋有小童size；而且船員對親子客的服務都幾細心，會幫手拿幼童櫈！
• 在郵輪碼頭落船後有免費shuttle去鑽石山和觀塘，交通方便（不過我地又有3個小朋友又有行李都係Uber算了⋯⋯）

可以改進

• World Dream上設有一個賭場，是唯一可以吸煙的室內場所，但有些設施需要小朋友穿過賭場才較方便到達，我們惟有不使用那些設施（幸好只有很少）了。
• 星期日落船時間比較早（10點之前），想瞓晏D都唔得⋯⋯不過返到屋企之後執好野仲有成大半日用，下午又可以帶佢地去放放電！搭飛機去完旅行真係冇試過可以咁！
• 由於《星夢情報》上船先見到，但又要照顧小朋友晚飯和瞓覺，到有時間睇睇節目表時就大部份活動都full了⋯⋯若果上船前可以online book定就好了。

Kidsmust真心推介世界夢號的親子郵輪🚢Staycation，以後親子旅行又多一個好選擇了！

細佬返到屋企，仲要即刻用Lego砌返架World Dream玩添（當然要Kidsmust爸爸幫手砌啦）